Baptist Church of Mizoram, Assembly hnuaia Rorelna sang ber, Assembly Executive Committee Meeting - August 22, 2024 (Ningani) BCM Hall, Headquarters Office, Serkawn-a neih chuan Mizoram People Forum (MPF) a tel ve chungchang Assembly-ah thlen an remti.
Vawiina Assembly Executive Committee Meeting hi BCM President, Rev. F. Ramdinmawia’n a kaihruai a, General Secretary Rev. R. Lalbiakliana’n Department hrang hrang report khaikhawmin a pe. Tun tum Executive Committee meeting-ah hian member 299 an kal a ni.
Meeting thurel zingah - Assembly 2024 rorel-in Mizoram People Forum (MPF) a tel ve tura sawmna ngaihtuahin la zir chian leh phawt ni se ti-a thu a dah chu bawhzuina hma la tura ruat ten an hmalakna an report te an thlir a. MPF leh a thawhpui Kohhran Pawl hrang hrang te rawna an zirchianna atang leh Council of Churches in Mizoram-a thawkho tura ruahmnna kal mek te thlirin BCM tel ve hi a rem lohna a awm lovin a hria a, Assembly 2025 ah MPF-a tel rawtna chu thlen chhoh remtih a ni. Hei bakah hian Finance and Pension Committee in Education Department Salary Budget a dah turin cheng nuai 287 leh sing 3 dah belh a dilna remtih a ni a, Object head-ah Honorarium Budget dah belh remtiin, Budget Head-a Relief to Church head chu Building Relief ti-a thlak rawtna pawm a ni bawk.
General Secretary Rev.R.Lalbiakliana’n Report tlangpui ziaka a tarlan zingah – Kum 2023-2024 BCM Main Account closing balance atangin cheng nuai 436 leh sing 7 (4,36,70,000/-) chu kum kal lai 2024-2025 a hman tura ruahman a nih thu a tarlang a, Council of Churches in Mizoram din tura hmalakna kal zelah October 26, 2024 ah hawnna inkhawm neih tum a nih thu te, Kristian Hlabu ennawn hna kal mekah BCM aiawh ten leh Synod aiawh ten ruahmanna siamin hma an lak mek thu te, Asia - Pacific Baptist Federation (APBF) Team Consultation - May 26-a Meleka ah BCM aiawh palai pahnih an kal thu te, APBF Youth Conference 2024 Malaysia-a neihah te BCM Choir leh Thalai engemawzat an kal thu te, Baptist Wold Alliance, Annual Council Meeting, July 7-12-a Lagos, S.Africa-a neih-ah President leh AGS Mission an kal thu te a tarlang bawk.
Report-in a tarlan langsar dang zingah kumin January – June 2024 chhungin Mission Field hrang hrangah ring thar 2499 an awm thu leh Kohhran thar 6 leh Fellowship thar 9 din a nih thu te, Cambodia-a thawk tur Tent Making Missionary pahnih lak an nih thu te, Lawngtlai, Lunglei leh Aizawl-ah te Mission Inkhawmpui buatsaih chhoh mek a nih thu te a tarlang bawk. Kumin Financial year chhungin Christian Hospital-a hman tur CT Scan, Endoscopy leh X-Ray khawl lei tum a nih thu te, Christian Hospital-a thawk tur Medical Officer (Doctor) pali lak thar an nih tawh thu te a tar lang bawk.
Assembly thurel bawhzuiin, September 7,2024-ah Ram pum huap awmni kham tawngtai neih tura ruahman a nih thu leh Social Concern Department hmalakna-in ram pum huapin Ruihhlo do beihpui neih mek a nih thu te, hemi atan hian Baseline survey neiin, Tualchhung Kohhran-ah Ruihhlo do campaign kalpui mek a nih thu leh Tleirawl leh nu leh pa te zingah hmalak chhoh mek a nih thu a tarlang bawk.
Education lamah kumin University exam result chhuakah HATIM atangin Topten a lang mi 17 an awm a, University puma toper pakhat an nei bawk. BHSS leh School dang te HSSLC leh HSLC result a tha viau bawk.
Chhawmdawlna hna thawhna lamah Cyclone Remal avanga chhiatna leh Fur ruahtui leh leimin avanga chhiat tawk te leh mitthi chhung te chhawmdawl nan R&D sum cheng nuai 17, sing 3 leh sang thum hman a nih thu te a tarlang a, Mizorama Chanchin Tha lo thlen dan Documentary Film – Mingo Hnuhnung buatsaih chu zawh thawkhat a nih thu leh October -4-ah tlangzarh tum a nih tawh thu a tarlang bawk.
