Usher hote Lawmthusawi in an tawngtai Pic: Lalropuia Fanai[/caption]
Mizoram Baptist Kohhran Rorelna sang ber - BCM Assembly vawi 119-na, March 4-8, 2015 chhunga BCM Biak In, Farmveng, Lungleia neih chu tluang takin nizan khan an tiak ta. Hriat theih chianah Rorel Palai inziaklut zat chu - 938 niin Zaipawl member leh chhimtu dang chhiar tel an ni lo a, a dawltu veng - Farmveng-a mikhual riak lut zat hi 542 an ni. Hetih lai hian Assembly Palai tura rawn kal, Upa Mangduna, Kum 76, Saiha Tlangkawn Kohhran Chairman chu nimin- Pathianni zing dar 3:00 vel khan a thi a, a ruang hi Pu S.Sangchungnunga te in ah lak nimin dar 8:00 Am khan an khaw lam Saiha panpui a ni a, vawiin-ah thlahliam a ni ang.
Assembly chhung hian zantin Vantlang Inkhawm neih thin a ni a, Assembly thupui - "Kohhran Nung" tih chu thupui thensawm hrang hrang hmangin thuchah ngaihthlak thin a ni. Nimin, March 8, 2015 chawhma inkhawm-chu Ordination Service atan hman a ni a, hetah hian Minister 6 (Pastor 5 leh Missionary 1) ordain niin Rev. C. Ngurhnema, BCM President-in a nemnghet a, Heng ordain thar te hian Testimony tawi an sawi theuh bawk. Chawhnu lamah Lalpa zanriah (Sacrament) kilhona neiin Zan lamah vantlang inkhawm neih a ni a, Rev. C. Ngurhnema, BCM President thar-in Inkhawm a kaihruai a, Rev. H. Lianngaia, General Secretary-in Assembly Rorel report leh thupawimawh puanna a nei a, Rev. H. Sangchema, Outgoing Presdident-in Thuchah a sawi.
March 5-7 (nithum chhung) chhun lama Assembly rorel Inkhawm neih thin a ni a. Kumina Assembly Rorel thu passed langsar zual zingah - “BCM hian ram pum huapin Environment humhalh kawngah hmalak te, Family Planning Programme-a Birth Control kalpui danah Pathian Thu zirtir dan mila inzirtir te, Pastor Bial thar 2 hawn belh te, Post thar 13 hawn te, Kum 2015 ah rampum huapin, kan ram tan chaw nghei tawngtai nilenga neih te, BCM-in zuk leh hmuam do kawngah tun aia nasa zawkin hma lak te niin, 2015-2016 Budget atan Rs.633,116,700/- an pawm bawk. Hetih lai hian Kum 2008 Assembly-in Pastor Nupui Sawrkar hnathawk mekte, Kum 2015 atanga bang tura thu a lo dah tawh tih danglam rawtna erawh chu hnawl a ni. (Assembly 2015 Minute pdf)(Assembly Minute 2015 Doc)
Assembly dawltu - Farmveng Kohhrante inbuatsaihna tha tak leh inpekna ropui tak avangin palaite leh BCM hotute an lawm hle. Kum 2016 BCM Assembly chu Hnahthial Bazar Kohhran-ah nghah niin 2017-ah Lunglei Chanmari Biak inah neih a ni ang.
