Mizoram Baptist Kohhran Rorelna Sang ber BCM Assembly vawi 118-na (Assembly neih tan kum atanga kum 100-na ni bawk) chu naktuk March 5, 2014 (Nilaini) zan atang hian tan a ni dawn ta a, hemi atana inbuatsaihn pawh a dawltu tur Serkawn Kohhran leh BCM Headquarters lam te inpuahchahna pawh peih fel a ni ta.  Assembly hi March 5, 2014 ah tanin March 9, 2014 Pathianni zanah a tiak ang. Kumin Assembly thupui tur chu "Chanchin Tha, Mitin Tan" tih a ni ang. March 5, 2014 Nilai zan (Assembly tan zan)ah Assembly  vawi 118-na hawnna leh Assembly kum za-na (Centenial Assembly) lawmna pualin Programme siam a ni a. A tuk, March 6-8 chhung nitin Assembly Rorelna neiin zan lamah Vantlang inkhawm neih thin a ni ang. March 9, 2014 Pathianni chawhma Inkhawm chu Ordination Service atan hman a ni ang a, hetah hian Minister 6 (Pro-Pastor Minter atana nemngheh tur 5 leh Missionary Minister atana nemngheh tur 1) te nemngheh an ni ang a. Rev.H. Sangchema, President, BCM-in a nemnghet ang. Kumin Assembly Rorel Agenda hi Department hrang hrang atanga Executive Committee-a thlen chhoh tawh Report leh pawmpui tura thlen te, ABC hrang hahrang atanga Agenda rawn lut leh Administraticve Wirking Committee atanga thu lo lut te an ni a. Agenda langsar leh ngaihven hlawh zual tur te hengte hi an ni:- 1. Arakan Mission/ Rakhine Mission leh Jharkhand Field hawn rawtna 2. Pastor Bial thar - Buarpui North leh South, Zobawk North leh South siam thu 3. BCM hian zuk leh hmuam do kawngah tun aia nasa zawkin hma la se 4. BCM Nursing School hi batch tinah Student 20 atangin 30-a tihlen ni rawh se 5. Mizoram Sorkar-in kumtin ni khat State pum huap tawngtai ni (State Day of Prayer) –ah puang se 6. Kolkata-ah hian Baptist House, BCM hian neih ve dan ngaihtuah ni rawh se. 7. Missionary Day, January 11 hi Kohhranten urhsun lehzuala kan hman a, vawn nun a nih zel theih nan Headquarters in hma la se. 8. BCM leh Presbyterian Kohhrante Inkhawmpuiah inpalai tawn leh turin hma lak nise. 9. Look East Mission Survey (South East Asia) leh India Mission Survey (India ram chhung) te BCM rawngbawlna chak leh mumal zawka kalpui a nih theih zir chian (Survey) hmasak ni rawh se. 10. Dialysis Machine leina atana Appeal siam dilna 11. Bishop’s College, Kolkata nena thawhho thu  12. Pay Commission, 2013 Report 13. Budget 2014-2015