Nimin August 22, 2012 tuk khan Arunachal West Field Ziro-a thingtlang khaw lian ber Hong-a Talo hnam (clan) puithiam upa ber leh awm chhun Pu Talo Ribia chuan Lal Isua a rinna Baptisma changin a puang chhuak. Ani thlaktu hi an awm tawh lo va, an hnam Kut Myako-ah (March-April) pawh Talo hnam hi an inthawi thei dawn tawh lo a ni! A fanu chu Sarthiin a lo thi tawh a. A sawi dan chuan a fanu ‘thlarau’ in (ramhuai anih a rinawm; hetiang ‘thlahrang’ hi Apatani-ho hlauh ber a ni) a hnena kal turin a ko va, August 21, 2012 (Thawhlehni) khan inawhhlum a tum a, a tih fuh lova, chhan chhuah a ni a; chemtea in vih hlum a tum leh a, an veng hman leh hram a. Kristianten Pathian thua kawmin an tawngtaisak ta a, Baptisma hi a chang ta a ni.

Good News Mission-ah Rev.C. Zatawna

Assam (Guawhati)-a Muslim zinga BCM rawngbawlna kengtu Good News Mission chu BCM nen zau zawka thawkdun turin hma lak mek a ni a. Tun hnaiah BCM chuan he Mission atan hian thawktu pahnih a tirh thar bakah a bul tantu leh vawiin thlenga chak taka kalpuitu Rev.Dr.C.L. Rema pui turin kan missionary retired, Pathian ram tulna avanga chawl hlei thei lo, Rev.C. Zatawna chu sawm a ni a.  Pu Tawna hian Guwahati-ah thut chilhin  September thla atang hian Muslim  zinga rawngbawlna hi a hmachhawn veleh dawn a ni.

1. Field tlawh  :

August 18 – 19, 2012 khan Lunglei Bazar Bial Mission hotute chuan Chakma Mission Field-a Circle thim ber Longpuighat an tlawh a, Pathianni kha Nghalimlui, Vaseikai leh Betbunya, Longpuighat-ah te insem darhin an hmang. Chakma Thuthlung Thar copies 100 lai leiin, an sem zo vek a, an fakawm hle mai.  

Zin chhuak  :

Mission Coordinator Rev. R. Lalrintluanga chuan Mizoram hmar thlang lama Bairabi vela Bru Baptist Church (BBC) te a tlawh kual a, August 22, 2012 khan a lo hawng. BBC Executive Secretary Rev. Lalzuitluanga pawhin Assam chhung Cachar District-a Bru unau Kristian la ni lote a tlawh a, August 21, 2012 khan a lo hawng. BBC hian Cachar-a Bru Kristian lote hnena Chanchin Tha hril  tumin hma a la mek a ni.

 Mission Convention  :

 i) August 17 – 19, 2012 chhunga BCM Diltlanga an Bial Mission Convention chu a hlawhtling hle. Speaker-in ‘I ram lo thleng rawh se,’ (Matthaia 6:10) tih thupui a sawi kohhran mipuiten an ngaithla tha hle a. Gospel Singer Nl. Bethsy Lalrinsangi zai pawh an hlut tak zet. Thlalakpuitu leh chaw eia sawmtu an tam hle.

ii) August 24 – 26, 2012 hian Lunglei Chanmari Bial chuan an Bial Mission Convention Chanmari Biak inah an nei dawn a. Speaker chu Mission Promoter a ni ang. Hriat theih chinah Chanmari Bial atang hian BCM Missionary : Chanmari – 5, Ramthar – 5 leh Zion – 5 an vaiin 15 (sawm panga) lai an chhuak a ni.

Missionary lak tharten an thawhna hmun an pan  : 

BCM Missionary tirhchhuah tharte chuan an thawhna tur hmun an pan ta sang sang mai, August thla chhung hian thleng kim tura tih an ni. Tv. David Laltanpuia, Evan., MP & MS leh Pu C. Lalruatkima, ET, Miria, Bangladesh te erawhchu remchan lohna avangin an thleng tlai hret dawn a ni.

Mission Promoter programme  :

BCM kohhranhoten Pathian ram an vei nasa tial tial a. Mission Promoter pawh a hahchawl hman lo! September 19 – 23, 2012 hian BCM Hermon, Theiriatah, September 28 – 30, 2012 hian BCM Bualteah Mission Convention Speaker tura sawm a ni. A sawmtute tan malsawmna anih theih nan Thlarau Thianghlim luah khahna thar leh hruaina i dilpui ang u.