Arunachal West Field atanga Mission Platinum Jubilee Main Celebration hmanga rawn kal, Adi Baptist Union Zaipawl member 18 te anmahni khua, Pasighat, Arunachal pana an haw lam chu Group hnihah inthenin mipa group chu bus-in an kal a, nimin khan tluang takin Arunchal an thleng a. Hmeichhe ho chu Maxicab ah an chuang a, nimin March 27, 2014 (Ningani) chhun khan Bandardewa leh Pasighat inkar, Pasighat atanga Km 400 vela hla, Assam ram chhungah an chuanna motor Brake Fail avangin kawng sira midang motor dinglai chu a su a, vanneihthlak takin thi leh hliam an awm lo hlauh a ni. Amaherawhchu, mi motor an sut chhiat avangin Rs. 120,000/- chawi turin an ti a, anmahni pawh engngemaw chhung chu man an niin rei tak an tangkhang a ni.

Hemi chungchang avang hian tukin khan BCM puipate leh Head of Department te emergency meeting neiin heng kan unau vanduaina tawkte hi keimahni (BCM) Programme avanga chah chhuah leh lo kal an ni a. Anmahni tanpui thei Kohhran leh mimal te tan tanpuina pek theih dan kawng dap ni se tiin Lunglei khawpui chhunga Kohhran lian deuh deuh te hnenah lehkha a thawn nghal a ni. Hemi chanchin hria te chuan anmahni tawngtaipui tur leh tanpui theite tan  Upa R. Lalbiakmuana, Accountant BCM Office hnenah tanpuina hi pek theih a nih thu an tarlang.