Imanuel Baptist Church, ZiroABA Confenrence 2013 neihna hmun tur[/caption]
Vawii, September 5, 2013(Ningani) zan atang hian Apatani Baptist Association (ABA) Conference chu Immanuel Baptist Church, Ziro-ah tan a ni dawn ta a, September 8, 2013(Pathinni) zan-ah an tiak ang. He inkhawmpui-ah hian Chhun lamah Rorel Inkhawm a awm ang a, kum 2013-2014 atana ABA hruaitu thlanna neih a ni ang a, zan lamah vantlang inkhawm neih thian a ni ang. Pathinni-ah Apatani hnam zinga B.D zir chhuak hmasa ber ordain tur a ni a, Rev.Dr.K.Lalrinthanga AGS/Mission-in a ordain ang. He Inkhawmpui hmanpui tur hian atangin Rev. Dr.K.Lalrinthanga, Associate General Secretary (i/c Mission), Nl. Bethsy Lalrinsangi leh Pu C. Lalengkima te an kal. Conference zawh hian AGS team-te hian Arunachal East leh Far -East Field te pawh an fang nghal dawn a ni.
Mission Convention :
i) Sept. 6 – 8, 2013 hian BCM Lawngtlai Vengpui (Lawngtlai East Bial) chuan Mission Convention an nei dawn a, Speaker atan Rev. B. Lalrinawma, Mission Coordinator an hmang ang. An thupui chu, “Dak ulang, lote en rawh u,” (Joh. 4:35) tih a ni.
ii) Sept. 6 – 8, 2013 vêk hian Lunglawn kohhran chuan Mission Convention an nei dawn a, Speaker atan Upa H.S. Lalhmingthanga, Mission Promoter a ni ang. Lunglawn kohhran hian Mizoram for Christ Team (Speaker – Upa C. Tlangmawia) ruaiin, Camp chhawng 5 lai an nei zo hlim a ni a. Convention hi ‘Camp Follow-up’ anga neih a ni. Kohhranten Mission rawngbawlnaah an chak thar phah theih nan heng programme te hi tawngtaipui ang u.
Kan lawmpui e :
i) Nl. C. Zodinmawii, ET, Elem English School, Dulukma, Tripura chuan A.I.C.S atangin M.Div. (Missiology) First Class-ah a passed. A.I.C.S-a M.Div. I-a pass hmasa ber a ni. Kan lawmpui a, kan chhuang tak zet a ni.
ii) Pu H.S. Zodingliana, ET, Elem English School, Dulukma, Tripura chuan Udaipur Hospital, Tripura-ah Dt. 3.9.2013 zan khan Fanu duhawm tak a nei a (a nupui Lalthanpuii’n), kan lawmpui tak zet bawk. Pathian hnenah lawmthu i sawipui ang u.
Ralvawng Mission Convention :
Sept. 13 – 15, 2013 chhung hian BCM Ralvawng, Zobawk Bial chuan Mission Convention an nei dawn a, Speaker atan Upa H.S. Lalhmingthanga, Mission Promoter an hmang dawn. Thupui chu, “Chanchin Tha hi hril rawh u,” (Mar. 16:15) tih a ni ang. An kohhranMission rawngbawlnaa ti chak thartu anih theih nan i tawngtaisak ang u.
Missionary Trainee kawm :
Sept. 1, 2013 Pathianni Chawhnu khan BCM Ramhlun ‘N’ Aizawl chuan A.I.C.S-a Diploma in Missionary Training zirlai Pu H.C. Lalhmunliana leh Tv. F. Zoramthara te chu Sharing neihtirin, an ‘interview’ zui. Bengvar thlak an ti hle. Pu H. Laltlankima, A.I.C.S-a an hotu pa’n a rawn kalpui. Ani hi Ramhlun ‘N’ kohhran atanga 1993 a chhuak, he kohhran atanga Missionary chhuak hmasa ber a ni. (1994 May-a chhuak Mission Promoter hi a 2-na a ni). A.I.C.S-ah hian Missionary 10 in Training an nei mek a; Missionary 2 M.Div. (Missiology) zir an awm mek bawk a ni. Rawngbawlna tha tak nei thei tura ‘thlarau lama tah hriam’ an nih theih nan, i tawngtaisak ang u.
Kohhrante thahnemngai lehzuala kan tawngtai a ngai :
Beirual thla Sept. a lo her chhuak leh ta a. Keimahni in tih chak thar nan Camp leh Crusade programme kannei deuh vek a. In tlawh leh Mission lam programme hmang pawh kan awm a. Kan piantharna te, kan harh tharna te, Lalpa faka kan lam luih luihna te hi – Lal Isua rawngbawlna (Mission) chhunzawma Lalpa Zema thlarau bote seng khawm a, tualchhungah leh Mission Field-a Pathian ram tizau thei tura thlarau lam ‘insawizawina’ pawimawh tak a ni a. Mahni Kal chhuak a, Thilpek pe a, thahnemngai lehzuala Tawngtaia - huai taka Chanchin Tha hril hi kan kova in nghat rawngbawlna a ni tih i hria ang u. Kan kiang hnai leh BCM Mission Field zawng zawngah Chanchin Tha meichher hi Thlarau Thianghlim thiltihtheihnain i chhi eng zau ang u. Tichuan, ringthar reports ngaihnawm tak tak kan hre leh thei dawn nia.
Field Tlawhtute hriat tur :
Kohhran leh a hnuaia Pawlho ten mahni insengsovin BCM Mission Field in tlawh thin a, a lawmawm hle. In tlawh tum hun leh in programme tlangpui te Mission hotute ziak (in writing) leh Telephone-a rawn hriattir zel turin kan ngen che u a ni. In hre tawn lova hmun khat intlawh thuah leh, Missionary then khat tlawhtu an neih tam avanga hah lutuk (an rawngbawl hna thawk tha hman lo pawh) an awm loh nan, a theih ang anga ruahmanna lo siam kan tum dawn a ni. Field tlawhtute leh an tlawh tur hmun hi Mission Coordinator Rev. B. Lalrinawma’n (Ph. 9436354061) record a vawng a. A hnenah khawngaih taka in ‘report’ vek turin ngen in ni e. BCM Mission Field tlawh apiang ten in rawngbawl dan reports tawi kim Mission Promoter rawn hriattir zel thei ula a lawmawm em em ang.
