May thla Pathianni vawi thumna hi kum tina Kristian Chhungkaw Ni atana Mizoram Baptist Kohhran-in kan hman thin a ni a. Kuminah pawh he Ni hi May 19, 2013 hian BCM chuan kan hmang leh dawn a ni. Kristian chhungkaw Ni lo intan dan chu heti ang hi a ni.

Kum 1948 khan North East India Christian Council (NEICC) khatih laia Assem Christian Council (ACC) inkhawmpuia Baptist Kohhran palai zu kalte chuan Assembly (Presbytery) –ah report an  pe a; Kristian chhungkaw pawimawhzia hi uar takin an sawi a. Assembly chuan Kohhran tinin bawhzui ni sela, May thla Pathianni remchang ber chu Kristian Chhungkaw niah hmang ila; chhungkaw inenkawlna pawimawhzia leh chhungkaw hlutna te hi sermonah thusawitu apiangin sawi thin ni rawh se tiin a rel a.

Tichuan kum 1948 atangin Kristian Chhungkaw Ni hi kan lo hmang tan ta a ni. Kristian Chhungkaw Ni hi Pathianni nimahsela, hetah hian programme hran siam a ni lo. A chhan chu Kristian Chhungkaw Chawlhkar kan lo nei ta a, he chawlhkarah hian thuzir tur leh kar pumpui programme (Kristian Chhungkaw ni telin) siam zel anih tak avangin. Kristian Chhungkaw Chawlhkar lo pian chhuah dan tawite in tarlang nghal ila.

Kum 2003 Assembly-a Kristian Chhungkaw Chawlhkar hman nisela tih thu lo lut chu titluk a ni a; Kristian Chhungkaw ni behchhana hman a ni. 2004 Assembly ah Kristian Chhungkaw Chawlhkar hman rawtna lo lut leh pawh remtih niin hman a ni leh a.  2005 Assembly ah pawh a lo lut leh a. Chuti anga a zawna tum thum lai ngaihtuah anih takah chuan Assembly chuan kum tin Kristian Chhungkaw Chawlhkar hi hi hman thin ni tawh rawh se tiin a rel ta a ni. Tichuan tuanah chuan Kristian Chhungkaw Chawlhkar hi kum tin kan hmang thin a ni.

            Kristian Chhungkaw Chawlhkara chhung tin zir tur headquarters atanga buatsaih chu zirin urhsun taka hman ziah a ni. He hunah hian Kohhran(pui) inkhawm ni lo, FOD  inkhawm leh tul dangte chu ti lo tura hriattirin Kristian Chhungkaw Chawlhkar chu duh thawh taka hman ziah a ni. Kristian Chhungkaw Chawlhkar hi Kristian Chhungkaw Ni nen inzawm chiaha hman thin a ni.

...........................

KRISTIAN CHHUNGKAW HAPTA  HMAN DAN TUR PROGRAMME (May 20-25, 2013)

May 19 (Pathianni ):  Thlarau Thianghlim thlen Ni (Penticost Ni) leh Kristian Chhungkaw Ni a ni bawk a. Thupui atan Thlarau Thianghlim thlen Ni Thupui “Thlarau Thianghlima khah” hi Pathianni zingah hman ni se. Pathianni zanah chuan Kristian Chhungkaw Ni a nih avangin “Kristian chhungkua chu-Tanpui ngaite tanpuitu” (Luka 10:25-36) tih hi hman a ni ang.

2.    May 20 (Thawhtan) zan: Thupui- “Pathian, Chhungkaw Innghahna” (God, The Foundation of the Family) 3.    May 21 (Thawhleh) zan: Thupui-  “Bible, Chhungkaw Hruaitu Êng” (Bible, the Guiding Light for the Family) 4.    May 22 (Nilai) zan:  In lama thuzir tur buatsaih a ni lo va, Biak In lama Thupui atan Kristian chhungkua chu-“Mi dangte tana malsawmna”(Gen 12:1-3) tih hi hman tur a ni. 5.    May 23 (Ninga ) zan: Thupui :-“Kohhran, Chhungkaw chenna In”(Church, Home for the Family)

6.    May 24 (Zirtawp) zan: Thupui :- “Thilpek, Chhungkaw Mawhphurh” (Giving, the responsibility of the Family).

7.  May 25 (Inrinni ) zan chu Tawngtai Inkhawm a nih avangin Thupui hran siam a ni lo. Lawmthu sawina leh BCM chhungkua zawng zawng intawngtaisakna atan hman tur a ni ang.