Mizoram-a Chanchin Tha lo thlen ni champha, vawi 119 na chu tunkar Zirtawpni, January 11, 2013 a ni a. Mizoram Baptist kohhran chuan kum dang ang bawkin he ni hi ram pumah urhsun takin a hmag dawn a. Chawhma lamah Kohhran tinah Inkhawm awmin Chawhnu lamah Inpawlhona neih a ni ang a, Zan lamah pawh hemi Ni pual Inkhawm a awm bawk ang. Kohhran engngemawzatin he Ni hi ruai nen an lawm leh dawn a, Kohhran thenkhat chuan sawhchiar an buatsaih bawk dawn a ni.
Missionary Day thuchah
Missionary hmasa ber Sap Upa leh Pu Buanga-te lo thlen Champha vawi 119-na chu Pathianin min lo hruai thleng leh ta a. He hun pawimawh takah hian Kohhran member zawng zawngte Mizoram Baptist Kohhran Headquarters Office atangin Chibai kan buk a che u. Sap Upa leh Pu Buanga ten Mizo hnam tana an thawh nasat zia leh Mizo hnam tana an hnathawh hlut zia hi hun reilo te chhunga sawi sen pawh a ni lovang.
Isua Krista Chanchin Tha min hrilh a, Chhandamna kawng min kawhhmuh a, Kohhran min dinsak a. A, AW, B leh lehkha chhiar tur min siam sak bakah zirna sikul min din saka, lehkha min zirtir bawk a. Kan Thlarau leh taksa tihdamna rawngbawl hna thawkin nun dan mawi leh tha te min zirtir a. Kan hnam hmasawnna lungphum phumtute an ni. Ramhuai biakna leh hlauhna lak ata Lal Isua Krista Chanchin Tha-in min chhan chhuak a, chatuanna nunna min pe a. Silh leh fen mumal tak pawh la inbel nachang hre lo, saruak deuh thaw kha an rawngbawlna avangin International Standard in kan lo inchei ve ta a, A, AW, B nei lo kha India ram pumpuiah ziak leh chhiar thiam tamna ber dawttu state kan lo ni ta reng mai.
Maurap in chhe te te-a khawsa thin zofate kha tunah chuan in tha tak tak mawi leh nuam tak takah kan lo khawsa ve ta, Ei leh in tur tuhnai engmah nei ngai lo zofate khan kan missionary te Sap Upa leh Pu Buanga rawngbawlna kal zel avangin ei tur tuihnai leh tha tak tak kan lo eiin kan lo in phak vet a. Mizo mipuite chhim leh hmar chhak leh thlang ami ten tun dinhmun kan lo thleng ta hi an mahni vang liau liau a ni. Lalpan kan pioneer missionary-te Sap Upa leh Pu Buanga-te hmangin thil ropui tak min tih sak avangin i lawm ang u. Kan ram sorkar, kohhran leh mipui zawng zawngte hian January 11, Missionary Day hi hlut na chang hria ila, kohhran tin ten Pathian hnena lawmthu sawina inkhawmna hun atan i hmang theuh ang u.
He hun ropui leh awmze nei takah hian lam thei lam ila, a lawm nan ruaite hial pawh theh thei chuan theh ila, kan missionary te rawngbawlna avanga Lalpa fak leh chawimawi nan i hmang theuh ang u. Kan ram sorkar-in chhuti ni atan a lo puang hi a lawmawm tak zeta, zofate khawvela kana wm ve chhung chu tihdanglam tawh lo nihial se a va tha dawn em! He ni ropui takah hian keini anga Chanchin Tha Malsawmna la dawng ve lo tam tak ten malsawmna an lo dawn ve theih na turin I in hlan thar zel ang u. Hlim taka Missionary Day hmang theuh turin Lalpan awmpui che u rawh se.
