BCM Kohhran Upa leh Pastor ten Field tlawh dawn :
2009 atanga kum tin kan neih angin 2012 hian BCM Upa leh Pastor te chuan Mission hotute ruahman angin Mission Field an tlawh leh dawn a. Nov. 20, 2012 hian an chhuak ang a, Dec. 2012 tirah an lo haw leh ang. Tripura Field leh Assam-Bengal Field an tlawh mai thei a, Assam boruak a ralmuang lo anih chuan Field dang an tlawh zawk mai thei bawk. Kal tum te chu Sept. 2012 chhung ngeia AGS i/c Mission hnenah in hriattir tur a ni e.
Upa HL Liantluanga Nu ropuina ramah :
Arunachal West Field chhung Mishing Area Dhemaji-a kan Missionary (Evangelist) Upa HL Liantluanga (Pu Tluanga) Nu Pi B. Chhawnthangi (74) chu Sept. 23, 2012 (Pathianni) tuk dar 10:45 khan an in Lunglawnah a thi a, a tuk Sept. 24, 2012 ah vui liam a ni. Pi Chhawni hi Zonu, tawngtai taima leh kohhran mi tak a ni a, BCM Shalom, Lunglawn Biala lawi a ni. A Nu enkawl hian Pu Tluanga pawh a rawn chhuak a. Mahse Field-a a chhuk hnu lawkah a Nu hian ropuina ramah a lo hawnsan ta a ni. Pu Tluanga hi a Nu thih vang hian a rawn chhuak leh mek. Kohhrana a thawhpuiten kan tuarpui tak zet a, Lalpan thlamuan se tih hi kan tawngtaisakna a ni.
3. Work Camp :
Sept. 24, 2012 atang khan BCM Farm Veng, Lunglei member 11 chuan Tuichawnga Missionary quarters Work Camp-in an sak sak. Tha taka an thawh a, Missionary te leh Chakma kohhran te nen inpawlhona hlimawm tak an neih theih nan i tawngtaisak ang u.
Tv. Koj Kojing tawngtaisak ngai :
Ziro, Arunachal West Field-a Midland Education Centre bul lawka Kristian lo, Kristiante haw em emtu fapa Tv. Koj Kojing, I B.A zirlai chu ramhuai tihbuai nge, rilru buai tih hriat lohvin a buai hle a, Missionary te leh Apatani kohhranhoten an tawngtaisak mek. Rilru leh taksaa damna a chan a, Lal Isua a rin theih nan, a tan hian i tawngtai ang u.
Mission Convention :
Sept. 28 – 30, 2012 chhung hian BCM Bualte chuan Mission Convention neiin, Mission Promoter chu Speaker atan an hmang. An kohhran hian Mission rawngbawlnaa chak thar nana an hman theih nan i tawngtaisak ang u.
Indonesia atangin Mazuala Hrahsel te lo haw :
BCM leh Global Interaction, Australia (GIA) thawhhona hnuaia Indonesia-a kan Rawngbawltu Mazuala Hrahsel te chhungkua chu rei lote cham turin Mizoramah an lo haw zawk. Oct. 1, 2012 hian Lunglei chhuahsanin, an awmna hmun lam an pan leh tawh ang. Mazuala leh Tetei te nupa hian an rawngbawlna tur Indonesia tawng an zir mek a, an thiam tan tawh viau. GIA chuan Indonesia thliarkar lian tak Sulawesi-a Muslim sakhaw biate zingah Chanchintha hriltu dangte nen tirh luh an tum a ni. Tluang taka an thlen chhoh theih nan i tawngtaisak ang u. (Am hming leh an nihna tak hi Internet kaltlang tur a nih avangin mizotawnga dah a ni)
Thahnemngai taka kan tawngtai a ngai :
Leilet leh lo neituten an kum tluan thawhrah buh an seng dawn mek a. BCM Mission Field-ah pawh thlarau lam buh seng mai theih an ‘hmin’ leh ta tuar mai! Pathian hlain, “Tap chungin buhchi an fehpui, Mittui nen boralte an zawng….” a lo tih angin, kan ai awha kan tirh Missionary te, a rammi thawktute leh kohhranhoten Lalpa zema thlarau bo tam tak an sengkhawm a, kohhran thar leh Fellowship thar an din belh zel theih nan, thahnemngai takin i tawngtai ang u. 2011 khan ringthar 7659 lai Baptisma kan chantir a, 2012 hian eng zat nge Lal Isua hnenah kan hruai thlen dawn le?
