Mizoram Thalai Kristian Pawl (MTKP) Inkhawmpui 2013-a Haulawng-a neih tur chu MTKP Executive Committee chuan a hun leh Ni an ruat fel ta. Inkhawmpui hun atan chuan March 21-24, 2013 ruat a ni. Inkhawmpui thupui chu thlan fel sa tawh niin ‘Lalpa hman tlak’ (II Timothea. 2:21) a ni a. MTKP Organiser, Rev. Samuel Lalremsanga chuan thuchhuah siamin MTKP Inkhawmpui-ah hian TKP unit a tam thei ang ber kal tur leh Zaipawl nei thei tur Unit-te chuan September 2012 ral hma ngeiin MTKP Organiser hnenah in report turin unit tin te a hriattir a ni. Bial zaipawl atang chuan a thlengtu Haulawng Pastor Bial Zaipawlte zai tura beisei an ni a; mi dang tan in report a ngai lo vang. Inkhawmpui duhawm tak kan neih theih nan Pathian hnenah thahnemngai taka tawngtaia tan la theuh turin Thalaite a chah a ni.
General Secretary Kolkatta-ah
BCM General Secretary, Rev.H. Lianngaia chu Vawiin June 1, 2012-a AICS-a Theological Board Meeting pawimawh ah telin naktuk, June 2 hian BWA Annual Gathering July 2-7, 2012 –a Santiago, Chile a neih tur atan Visa buaipui turin Kolkotta ah a tlang nghal ang a. June 5 hian interview a hmachhawn ang.
Lawngtlai East bialah Kohhran thar
Lawngtlai East pastor bial, Vengpui area huam chhung SP Road-ah nimin June 2, 2012 khan Mizoram Baptist Kohhran a ding thar a. Kohhran hmingah BCM Zion tih a ni. He Kohhran hi Immanuel leh Vengpui atanga indang an ni a, member 125 vel an ni. Kohhran thar hawnna hi an bialtu pastor, Rev.L.Lalsawmliana hovin neih a ni.
Worship & Music Department Programme
Worship & Music Department Director, Rev.R. Lalbiakliana chuan nimin June 2, nileng khan Zotlang Pastor bial hualpin Zotlang Biak inah Worship Seminar a neihpui a.
Thorang Bial TKP Meet
Thorang Pastor bial TKP chuan June 2-3, 2012 hian Thenhlum Biak inah Meet programme an nei mek a. Speaker-ah MTKP Vice President, Pu Pc Vanlalrova hmangin MTKP Treasurer, Pu F.Lalromawia’n Music Training a neihpui ang a; Executive Committee member, Pu RK Vanlalsiammawia’n Environment paper a present bawk ang.
Pehlawn Kohhranah Crusade
Aizawl atanga hmar chhak lam Khawruhlian bial huam chhunga Pehlawn Kohhranah an bialtu pastor, Rev.K.Laldosanga speaker-a hmangin May 29 zan atang khan Crusade an nei a. Kar kal ta Pathianni hmang khan Lailak Biak inah Bial KNP Inkhawmpui an lo nei tawh bawk.
Pangzawl KNP te Bial pawnah an fehchhuak
Pangzawl Ramrikawn Unit KNP te chuan bial pawn fehchhuah project tihhlawhtlingin nimin khan Lungmawi Kohhran tlawhin an fehchhuak a. Thupui atan ‘Rinawmna’ tih an thlang. Zan riaka KNP fehchhuak Baptist Today-in kan dawn hmasak ber a ni awm e.
