Planning Commission ruahmanna, Administrative Committee-in a umzuina 'Kohhran Office-a thawktute intuaitharna leh in chher hriamna atana exposer programme' neih mek ah, Headquarters Office, Executive Secretary Office-Aizawl leh Lawngtlaia thawktu mi 14 te  chu Guwahati leh New Delhi tlawh-in November 21 khan an chhuak.

November 22-23, 2023 hmang khan Mawprem Presbyterian Church Shillong-ah North East India Christian Council Foundation Day leh Seminar neih a ni a. Seminar-ah hian Tunlaia Manipur State in harsatna a tawh mekte sawihona hun hman a nih bak ah, Uniform Civil Code in North East mipuite a nghawng theih dan turte zirho a ni bawk. NEICC foundation day lawmnaah hian Rev. R. Lalnunzira, AGS-Service chuan NEICC President a nih angin hawnna inkhawm kaihhruaiin, a tawp zanah Pathian thuchah a sawi bawk.

Mizoram Baptist Kohhran – Area Baptist Council (ABC) Rorel leh Inkhawmpui chu November 24 - 26, 2023 chhung hian ABC 17-ah neih a ni dawn a. Zanin, November 24, zirtawp zan atangin Inkhawmpui hi tanin, Inrinni nilengin ABC Rorelna neih a ni ang, ABC Executive Committee thute bakah Pastor Bial  atanga Agenda lut te, ABC kal tlanga Assembly 2024-a thlen tura chhawpchhuah te ngaihtuah a ni ang.

Pu Lalrinawma, Co-Ordinator, Relief and Development Department chu  November 17 leh 18, 2023-a Church Auxiliary Social Action (CASA) National Board Meeting - National office, New Delhi-a neihah, BCM  aiawhin a tel.

November 19 (Pathinni) kha Mizoaram Baptist Kohhran Ni Pawimawh, ‘Naupangte Ni’ a ni a. Kumin Naupangte Ni thupui chu “Tho la, naupang kha kaitho la, i kutin chelh rawh” (Gen. 21:18) tih a ni.. Tualchhung Kohhran tinah Thupui hmang hian thuchah ngaihthlak a ni a, Tualchhung Kohhran tam zawk chuan He Ni-ah hian Headquarters duh dan angin Naupangte Ni thupui hmangin Naupangte enkawl leh kaihhruai kawnga Nu leh Pate mawhphurhna lam thuchah ngaihtlain hun an hmang a, Naupangten Zaia rawngbawlna an nei bawk.

November 19 (Pathianni) chawhnu dar 1:30 khan BCM Biak In, Chanmari, Lunglei Jubilee Hall-ah Mizoram BMP Media Cell buatsaihin Media Campaign neih a ni a. MBMP in media platform hrang hrang a neih te inkawhhmuhna neih nghal a ni bawk. Media campaign ah hian MBMP hruaitu te, Media Cell hruaitute leh Lunglei khawpui chhunga BMP unit hrang hrang aiawh mi 50 vel an kalkhawm a ni.

November 13, 2023 (Thawhtanni) zing dar 8:30 khan Mizoram chhim lam, Mara ram, Lakher hnam zinga Zo sap Missionary hnuhnung ber, Rev. Violet Louise Anne Mark (Pi Vaili) kum 85 chu November 13, 2023 zing dar 8:30 khan a chenna in, Saikao (Serkawr) ah a boral a. November 15, 2023 (Nilaini) khan Serkawrah thlah liam a ni.

November 10-12 hmang khan BKHP Mamit Pastor Bial te chuan BCM Biak In, Dapchhuah-ah Inkhawmpui an nei a, thupui ah “Lalpa lo kal lehna” tih hmang in mi hrang hrang hnen atangin thuchah ngaihthlak a ni.

November, 10-12, 2023  hmang khan Pastor Bial pali ah Bial TKP Rorel leh Inkhawmpui hetiang hian neih a ni.

Saisawm Sazai Baptist Association (SSBA) hruaitu mi 19 te chuan November ni  14-19  chhung khan BCM Headquarters rawn tlawhin kohhran chanhcin an zir bak ah kohhran zirna in leh hmun pawimawh hrang hrang te fang kualin hun an hmang

Tunkar thawhlehni atanga zirtawpni, November 14-17, 2023 chhung khan  Christian Hospital Serkawn-a thawktute chuan Rev. VL Nithanga  speaker-a hmangin thawktu te leh zirlai te pualin intuaitharna (Retreat) an nei a.   Thawktute batch hnih-ah inthenin, Damdawi in inenkawlna leh duty ti buai lovin Retreat hi an hmang a ni.

November 17-19, 2023 hmang hian Asia Pacific Baptist Federation (APBF) kum 50-na (Golden Jubilee) lawmna International Baptist Church, Singapore-ah neih mek a ni a. Golden Jubilee thupui-ah “Imagine the Future Together” tih chu hman a ni

November 12 (Pathinni) chawhnu dar 1:30 khan BCM Central Church Kohhran Hall-ah Mizoram BMP Media Cell buatsaihin Media Campaign neih a ni a. Aizawl khawpui chhunga Bial leh Unit aiawh mi 70 chuang zet an kal khawm a ni.

November 11, 2023 (inrinni) khan Mizoram Baptist Kohhran leh Asia Pacific Baptist Aid te bul tumin Thaizawl Refugee Camp-ah Medical Camp hi buatsaih a ni a. R&D Department leh Medical & Health Department-te tang tlanga buatsaih niin, R & D lam atangin Rev. L. Vanlalsanga Director  leh Pu Lalrinawma, Coordinator  ten an telpui a ni.

November 12, 2023 (Pathianni) chhun dar 12:15 khan Paalanaa Bhavan, Nandi Durga Road, Benson Town, Bangalore ah BCM Bengalore hawnna inkhawm neih a ni a.  Inkhawm hi Rev. Dr. R. Zolawma’n kaihruaiin, General Secretary Rev. R. Lalbiakliana’n kohhran thar hi hawngin Rev. R. Lalrintluanga, Executive Secretary Aizawl in kohhran thar Pathian hnena hlanna a nei a.  AGS (Service) Rev. R. Lalnunzira’n Pathiin thuchah sawiin, Tv. Jonathan Lianhna leh Nl. Lalnunmawii Renthlei ten zaia rawngbawlna an nei.