October ni 7, 2024, Thawhtanni chawhnu dar thum khan AICS Faculty quarters thar hawnnna leh AICS kum 25-na hriatrengna atana Jubillee Multipurpose Hall lungphum phumna neih a ni a. Quarters hawnna inkhawm hi Principal Rev. D.C.Vanlaldika'n kaihruaiin, quarters sak dan tlangpui report a pe. Report in a tarlan danin quarters hi a dung feet 60, a vang feet 35 a ni a, a sak nan hian cheng nuai 47 dawn sen a ni. Rev. Dr. R. Lalbiakliana, General Secretary in quarters hi Pathian hnena hlanin tawngtaina hun a hmang a, Luangmual bialtu Pastor Rev. T. Lalawia'n inkhawm malsawmna in a khar a.

RC Vanlalhruaii D/o Lalhmingthangi, Dinthar, Aizawl chu Council of Churches in Mizoram (CCM) Office, Mission Veng, Aizawl-a Office Assistant cum Accountant hna thawk turin thla ruk (six months) chhung atan lak a ni.

October 1-3 hmang khan India Baptist Women’s Union (IBWU) General Assembly vawi 15-na Chennai, Tamilnadu-ah neih a ni a. Inkhawmpui thupui atan I Thessolonica 5:11 tlawh chhanin “I in dawmkang tawn zel ang u” (Build each other up) tih an hmang a ni. He Conference hmang hian MBKHP atangin hruaitute leh member an kal a, Kumin Inkhawmpui-ah hian Kum 2024- 2029 chhung atan India Baptist Women's Union (IBWU) President atan Rbt.Dr. Zoramthangi (MBKHP) chu ruat a ni.

Director, Medical & Health Department report in a tarlan danin – September 2024 chhungin Christian Hospital Serkawn-ah damlo 2560 in entirin, an zinga 370 admit an ni a, nau piang 53 an awm laiin mitthi 11 an nei thung. Report kimchang hetiang hi a hi:-

Assembly Rorel thu pass Ruihhlo do beihpui thlak bawhzuina kal zelah Bial leh Kohhran hrang hrang-ah Ruihhlo do campaign neih chhoh mek a ni a. September 29 (Pathianni) khan BCM Leite-ah Roihhlo do Campaign neiin Social Concern Department Director Rev. L. Vanlalsanga leh Nl. Laldinthari Ralte, Field Facilitator te an kal.

Tunkar Thawhtanni, October 1, 2024 khan Headquarters-a thawktu te chuan faina hnatlang an nei a. Thawktu te hi group hrang hrang ah in then in, Mahni lawina office leh Institution Compound te an ti fai a, damlohna, Committee leh duty pawimawh dang avanga tel thei lo tih loh chu thawktu ten he hnatlang hi ngaipawimawhin an thawkchhuak tha hle a ni.

September 27-29 chhung khan Buarpui South Bial TKP chuan “I nunna turin tlan chhuak rawh”. (Gen 19:17) thupuia hmangin BCM Biak In, Immanuel-ah Bial TKP Intawhkhawm (TKP Meet) leh Bial Rorel an nei a, Speakerah Upa P.C.Vanlalrova, Senior Adviser MTKP an hmang. MTKP atang hian Executive Committee member pahnih Pu Lalrammuana Sailo leh Nl Grace Lalrindiki te an kal bawk. Serchhip Pastor Bial zaipawl te’n zaia rawngbawlin Meet hi an hmanpui bawk. Inrinni zan atanga Pathianni zan thlengin zaia rawngbawlna an nei thin bawk.

Chakma Mission hnuaia Baptist Mission School, Tuichawng a Evan. Teacher thawk lai Upa Ch. Hmingthanga chu October 01, 2024 hian Superannuation pension-a a chhuah dawn tak avangin, September 27, 2024 khan Tuichawngah, Tuichawng Area a thawktuten Chakma Mission pumpui aiawhin ama quarters-ah thlahna an nei.

Baptist Higher Secondary School, Serkawn chuan September 23, 2024 atang khan School Annual Sports an nei a. Thawhtanni khan Lena Studium, Serkawn Melte-ah Opening Ceremony neiin, khuallianah Pu V. Malsawmtluanga, Vice Chairman, HPC, Lunglei an hmang. Zirlai te hi House-ah inthenin Sports Discipline hrang hrang bakah Solo, Beat Conterst, Girls Band leh Cultural Item hmanga Inelna te neih a ni. Vawiin, September 27, 2024 (Zirtawpni) chawhnu hian Sports kharna Inkhawm neiin, Inelna hrang hrang a thi tha te hnenah lawmman sem a ni ang.

September 25, 2024 (Nilaini)chawhnu dar 2:30 khan Upa Biakchungnunga, Office Superintendent, BCM Headquarters Office chu October 1, 2024 atang khian Superannuation pension-a a chhuah dawn tak avangin BCM Headquarters Office-a a thawhpui ten BCM Hall-ah amah thlahna an nei.

September 25, 2024 (Nilaini) zing dar 10:00 khan BCM Hall, Headquarters Office, Serkawn-ah Kohhran Upa Exam Result 2024 tih chhuah a ni a. Rev. Vanlalmuankima, Director, Pastoral Ministry Department in he hun hi kaihruaiin, report tlangpui a pe nghal a, General Secretary Rev. Dr. R.Lalbiakliana’n Result tlangzarhin, Pathian hnena lawmthusawi tawngtaina-in hun tihtawp a ni.

September 20,2024 (Zirtawpni) chhun dar 12:00 khan Mizoram Baptist Kohhran, Cheural, chuan an Biak In thar chu BCM President Rev. F. Ramdinmawia’n hawngin Pathian hnenah a hlan. Pu Lalruatkima, Administrative Officer-in he hun hi hmapuiin chibaibukna a sawi a, Biak In  sakna tura  Concept drawing leh Architectural design zawng zawng siam sak tu Upa T. Lalhlimpuia, BCM Venglai pawh an sawm angin Biak In hawn programme hi hmanpuiin, lawmpuina thu a sawi bawk.

Mizoram Baptist Kohhran rorelna sang ber Assembly 2024-in 12th Pay Commission din a rawt angin, 12th Pay Commission chu a vawi hnihna atan September 17, 2024 khan General Secretary Room, Headquarters Office-ah an thukhawm.

September 17, 2024 khan Mizoram Nursing Council chuan General Nursing Midwiferym(GNM) result 2024 a ti chhuak a. Tun tum result tih chhuah-ah hian School of Nursing, Christian Hospital Serkawn chuan result tha tak neiin, Candidates 60 atangin mi 49 (81.6% ) in hlawhtlinna changin, an zinga mi 11 te To-Ten-ah an lang a. Top-ten-a lang zingah hian Second Year zirlai Lalbiakliani chuan Mizoram pumah pakhatna a hauh a ni

Spetember 16, 2024 (Thawhtanni) khan Mizoram Baptist Kohhran leh Champhai Grape Grower Society te chuan Champhai Winery, Tlangsam-ah Inremna thuhtlung (Memorandum of Understanding) kum hnih chhung atan an ziak thar.